សមត្ថកិច្ចចុះរុះរើ និងលុបរណ្ដៅរ៉ែមាស ៨ កន្លែងនៅខេត្តក្រចេះ
សកម្មភាពលុបរណ្ដៅរ៉ែមាសខុសច្បាប់នៅក្រចេះថ្មីៗនេះ។ Fresh News
ឃុត សុភចរិយា
26 February 2019 | 09:06 ICT
ក្រចេះ: រណ្ដៅអាជីវកម្មរ៉ែមាសអត់ច្បាប់ចំនួន ៨ កន្លែងនៅតំបន់អូរត្រូន ក្នុងឃុំក្បាលដំរី ស្រុកសំបូរ ត្រូវបានក្រុមអនុគណៈកម្មការបង្ក្រាប និងទប់ស្កាត់បទល្មើសធនធានធម្មជាតិខេត្តក្រចេះ ចុះរុះរើ និងឈូសឆាយដីចាក់លុបព្រមទាំងវាយកម្ទេចឧបករណ៍និងសម្ភារមួយចំនួនដែលជាមធ្យោបាយបម្រើឲ្យអាជីវកម្មរ៉ែមាសខុសច្បាប់។
លោក ខ័ណ្ឌ ចំណាន អភិបាលរងខេត្តក្រចេះដែលបានដឹកនាំការបង្ក្រាបបានប្រាប់ភ្នំពេញប៉ុស្តិ៍កាលពីម្សិលមិញថា កន្លងមកក្រុមការងាររបស់លោកបានចុះអប់រំដល់ពលរដ្ឋឲ្យបញ្ឈប់ជាបន្ទាន់នូវការធ្វើអាជីវកម្មរ៉ែមាសខុសច្បាប់ និងបានតម្រូវឲ្យពលរដ្ឋចំនួន ១៥ គ្រួសារចុះកិច្ចសន្យារុះរើនិងលុបចោលនូវរណ្ដៅដីអាជីវកម្មរ៉ែមាសរបស់ពួកគេដោយខ្លួនឯងក្នុងរយៈពេល ១ សប្ដាហ៍។
លោកបានបន្តថា៖ «ប៉ុន្តែរហូតមកទល់ថ្ងៃចុងសប្ដាហ៍មុននេះ ក្រុមការងាររបស់យើងបានពិនិត្យឃើញនៅមានសេសសល់ ៨ កន្លែងទៀតមិនទាន់ធ្វើតាមកិច្ចសន្យា ដូច្នេះសមត្ថកិច្ចយើងចាំបាច់ត្រូវតែចុះរុះរើនិងលុបចោលនូវអាជីវកម្មរណ្ដៅរ៉ែមាសខុសច្បាប់ទាំងនោះ»។
បើតាមលោក ចំណាន ចាប់តាំងពីឆ្នាំ ២០១១ មក តំបន់អូរត្រូន ត្រូវបានក្រុមហ៊ុនចិនមួយឈ្មោះ Xing Yuan Kanng Yeak Co., Ltd ទទួលបានអាជ្ញាប័ណ្ណពីរដ្ឋាភិបាលកម្ពុជាក្នុងការធ្វើអាជីវកម្មរ៉ែមាសលើផ្ទៃដីទំហំ ២៨ គីឡូម៉ែត្រការ៉េ។ ប៉ុន្តែ ៣-៤ ឆ្នាំកន្លងមកនេះ ក្រុមហ៊ុនបានផ្អាកដំណើការអាជីវកម្មបណ្ដោះអាសន្ន បន្ទាប់ពីមានករណីស្រុតរណ្ដៅដីរ៉ែមាសសង្កត់ស្លាប់និងរបួសកម្មករជាច្រើននាក់។
លោកបានថ្លែងថា យ៉ាងណាក៏ដោយ កាលពីពាក់កណ្ដាលឆ្នាំ ២០១៨ ក្រុមហ៊ុនបានចាប់ផ្ដើមជួសជុលនិងរៀបចំខួងរណ្ដៅរ៉ែមាសនោះឡើងវិញ។ ទន្ទឹមនឹងនេះ ក្រុមហ៊ុនបានស្នើឲ្យអាជ្ញាធរមូលដ្ឋានជួយអន្តរាគមន៍ដល់ពលរដ្ឋក្នុងតំបន់នោះឲ្យបញ្ឈប់ធ្វើអាជីវកម្មជីករណ្ដៅរ៉ែមាសលួចលាក់ក្នុងតំបន់ដីសម្បទានរបស់ក្រុមហ៊ុនតទៅទៀត បើពុំដូច្នោះទេក្រុមហ៊ុននឹងប្ដឹងពួកគេឡើងតុលាការ។
លោក សុខ គីរីរតន៍ ប្រធានមន្ទីររ៉ែ និងថាមពលដែលបានចូលរួមក្នុងប្រតិបត្តិការនោះកាលពីថ្ងៃសុក្រ និងថ្ងៃសៅរិ៍សប្ដាហ៍មុនបានថ្លែងថា វិធានការលើកនេះគឺអាជ្ញាធរបានសម្រេចកម្ទេចចោលរោងសិប្បកម្មតូចធំចំនួន ៨ ដោយបានប្រើអេស្កាវ៉ាទ័រ ២ គ្រឿងនិងប៊ុលឌូស៊ែរ ១ គ្រឿង មកឈូសឆាយនិងកាយដីលុបរណ្តៅរ៉ែមាសខុសច្បាប់ទាំងនោះចោលឲ្យអស់តែម្តង។
លោកបានបញ្ជាក់ថា៖ «ប្រតិបត្តិការនេះ សមត្ថកិច្ចយើងបានសម្រេចលុបបំបាត់ទាំងស្រុងនូវរណ្តៅរ៉ែមាសខុសច្បាប់ចំនួន ៨ និងកាយដីចាក់លុបស្រះតូចៗដែលគេរក្សាទឹកទុកធ្វើសកម្មភាពកិនដីនិងថ្មរ៉ែបាន ១២ ស្រះឈូសពង្រាបពំនូកដីរ៉ែចោលបាន ២០ ពំនូក និងបានឲ្យអ្នកភូមិដែលបានលួចធ្វើអាជីវកម្មរ៉ែមាសខុសច្បាប់ធ្វើកិច្ចសន្យាបញ្ឈប់សកម្មភាពខុសច្បាប់របស់ខ្លួនដោយព្រមានថានឹងចាត់វិធានការតាមផ្លូវច្បាប់ក្នុងករណីមានបណ្ដឹងពីខាងក្រុមហ៊ុន»។
ទាក់ទិនករណីនេះ លោក ឃិន ឡេង ជាអ្នកភូមិម្នាក់ក្នុងចំណោមអ្នកភូមិ ១៥ គ្រួសារនៅតំបន់អូរត្រូនដែលធ្លាប់លួចលាក់ធ្វើអាជីវកម្មរ៉ែមាសខុសច្បាប់កន្លងមកនេះ បានថ្លែងថា ក្រៅពីមុខរបរធ្វើស្រែចម្ការ អ្នកភូមិភាគច្រើនបានធ្វើចំណាកស្រុកទៅរកការងារធ្វើនៅតាមបណ្ដាស្រុកនិងរាជធានី-ខេត្តមួយចំនួនដើម្បីដោះស្រាយជីវភាពគ្រួសារ ប៉ុន្តែអ្នកភូមិមួយចំនួនតូចរួមទាំងរូបលោកផងដែរបាននាំគ្នាធ្វើអាជីវកម្មរ៉ែមាសដោយជីកយកអាចម៍ដីពីរណ្ដៅរ៉ែមាសរបស់ក្រុមហ៊ុន ដែលបានបិទចោលមកកិន និងកែច្នៃរកមាសដើម្បីដោះស្រាយជីវភាពគ្រួសារ។
លោកថា៖ «អាជីវកម្មនេះជាផ្នែកមួយក្នុងការជួយបង្កើនប្រាក់ចំណូលក្នុងគ្រួសាររបស់ខ្ញុំប៉ុន្តែយើងក៏មិនអាចជំទាស់នឹងបម្រាមរបស់អាជ្ញាធរដែរព្រោះយើងគ្មានច្បាប់អនុញ្ញាតនោះទេ។ម្យ៉ាងទៀតរណ្ដៅរ៉ែមាសទាំងនោះជារបស់ក្រុមហ៊ុនដែលគេទទួលបានសិទ្ធិពីរដ្ឋក្នុងការវិនិយោគលើវិស័យអាជីវកម្មរ៉ែមាសនេះ»។
កាលពីប៉ុន្មានថ្ងៃមុននេះ ខាងក្រុមហ៊ុនបានដឹកឧបករណ៍ និងសម្ភារបច្ចេកទេសចំនួន ៣ កុងតឺន័រចូលទៅក្នុងការដ្ឋានរបស់គេដើម្បីដំណើការអាជីវកម្មរបស់ពួកគេឡើងវិញ។
នេះបើតាម លោក សុខ យឿន មេភូមិអូរត្រូន កាលពីម្សិលមិញ។ លោក សុខ យឿន បានថ្លែងថានៅពេលក្រុមហ៊ុនចាប់ផ្ដើមដំណើរការអាជីវកម្មរ៉ែមាសឡើងវិញនោះ អ្នកភូមិដែលចូលចិត្តប្រកបមុខរបរធ្វើរ៉ែមាស
អាចទៅបម្រើការងារជាកម្មករផ្នែកអណ្ដូងរ៉ែមាសឲ្យក្រុមហ៊ុនដើម្បីរកប្រាក់ចំណូលបន្ថែមពីការងារស្រែចម្ការរបស់ពួកគេបាន ៕
Comments
Post a Comment