ផ្លូវជាតិលេខ៧ ពីក្រុងក្រចេះ-ស្រុកសំបូរ ប្រវែង ៩៣គីឡូម៉ែត្រ សម្រេចការស្តារឡើងវិញ ១០០%ហើយ
ថ្ងៃនេះ ម៉ោង 08:41
ចំនួនមតិ 0 | ចំនួនចែករំលែក 17
កំណាត់ផ្លូវជាតិលេខ៧ ពីចំណុចគីឡូម៉ែត្រលេខ៣៣១ (រង្វង់មូលខ្លាស្ទុះ) ស្ថិតក្នុងភូមិកាប៉ូ សង្កាត់អូរឬស្សី ក្រុងក្រចេះ រហូតដល់ចំណុចគីឡូម៉ែត្រលេខ៤២៤ ចំណុចអូរកណ្តៀរ ស្ថិតក្នុងភូមិអូរព្រះ ឃុំអូរគ្រៀង ស្រុកសំបូរ ជាប់ព្រំប្រទល់ខេត្តស្ទឹងត្រែង ដោយមានប្រវែងជាង ៩៣គីឡូម៉ែត្រ ត្រូវបានស្ដារឡើងវិញសម្រេច ១០០ភាគរយហើយ គិតត្រឹមថ្ងៃទី១៤ ខែធ្នូ ឆ្នាំ២០១៨។
លោក លឹម ស៊ីដេនីន រដ្ឋលេខាធិការក្រសួងសាធារណការនិងដឹកជញ្ជូន បានដឹកនាំក្រុមការងារ និងលោក ស្រេង ស្រស់ ប្រធានមន្ទីរសាធារណការ និងដឹកជញ្ជូនខេត្តក្រចេះ ចុះត្រួតពិនិត្យ និងវាយតម្លៃបច្ចេកទេសគុណភាពបន្ទាប់ពីក្រុមហ៊ុនចិនបានសាងសង់ផ្លូវនេះរួចរាល់ជាស្ថាពរ។
លោក លឹម ស៊ីដេនីន និយាយថា នេះគឺជាគម្រោងលើកទីមួយហើយ ដែលក្រុមហ៊ុនភាគីចិនប្រគល់ឱ្យក្រសួងសាធាណការ និងដឹកជញ្ជូន ធ្វើការសិក្សា គំរូប្លង់ដោយខ្លួនឯង និងប្រើប្រាស់នីតិវិធីលទ្ធកម្មជ្រើសរើស ទីប្រឹក្សាបច្ចេកទេសត្រួតពិនិត្យ សាងសង់ និងក្រុមហ៊ុនម៉ៅការសាងសង់ខ្លួនឯងផងដែរ។
សូមជម្រាបថា គម្រោងស្តារឡើងវិញកំណាត់ផ្លូវជាតិលេខ៧ ដែលជាជំនួយឥតសំណងរបស់ចិនតម្លៃជិត ៤០លានដុល្លារនេះ ត្រូវបានក្រាលបេតុងកៅស៊ូ AC កម្រាស់ ០,១០ម៉ែត្រ និងបំពាក់គ្រឿងសង្ហារឹមផ្លូវថ្នល់គ្រប់គ្រាន់ ដែលអនុវត្តការងារដោយក្រុមហ៊ុនសំណង់សៀងហៃគ្រុប (SCG)។
លោករដ្ឋលេខាធិការ ក៏បានអំពាវនាវដល់ម្ចាស់អាជីវកម្ម យានយន្ត ធុនធំគ្រប់ប្រភេទ ដែលកំពុងប្រើប្រាស់ លើដងផ្លូវជាតិ កុំដឹកជញ្ជូនផ្ទុកលើសទំងន់ដែលច្បាប់កំណត់ឲ្យ និងចូលរួមថែរក្សា ការពារនូវសមិទ្ធផលនានា ជាពិសេសសមិទ្ធផលផ្លូវជាតិលេខ៧នេះ ដើម្បីប្រើប្រាស់ឱ្យនៅគង់វង្សបានយូរអង្វែងនិងបញ្ចៀសនូវគ្រោះថ្នាក់ចរាចរណ៍តាមដងផ្លូវជាតិ ដែលកើតឡើងជាយថាហេតុ៕
Comments
Post a Comment