សំណុំរឿងឃាតកម្មសម្លាប់ផ្តាច់ពូជ១គ្រួសារ រួចដុតកម្ទេចសាកសពចោល នគរបាលមិនទាន់ស្រាវជ្រាវ រកជនល្មើសឃើញនៅឡើយទេ
ខេត្តក្រចេះ ៖ នគរបាលខេត្តក្រចេះ មិនទាន់បំបែកសំណុំរឿងឃាតកម្ម វាយសម្លាប់មនុស្សផ្តាច់ពូជ១គ្រួសារ មានគ្នា៤នាក់ ប្តីប្រពន្ឋនិងកូនប្រុស ស្រី ២នាក់ រួចដុតកម្ទេចសាកសពចោល គឺនគរបាលព្រហ្មទណ្ឌ មិនទាន់ស្រាវជ្រាវ រកពន្លឺនៃបទល្មើស ឃាតកម្មដ៏ព្រៃផ្សៃនេះឃើញនៅឡើយទេ បើទោះបីជានគរបាល កំពុងតែខឹតខំស្រាវជ្រាវជ្រាវយ៉ាងណាក៏ដោយ។
គិតត្រឹមថ្ងៃទី១៥ សីហា នេះ មានរយៈពេល៣ថ្ងៃហើយ ដែលសំណុំរឿងករណីអំពើ ឃាតកម្មដ៍សាហាវនេះ គឺនៅមិនទាន់បំបែកសំណុំរឿងបាននៅឡើយទេ បើទោះបីជានគរបាលព្រហ្មទណ្ឌខេត្ត បានឃាត់ខ្លួនមនុស្សជាច្រើននាក់ដើម្បីសាកសួរយ៉ាងណាក៏ដោយ។ ជាមួយគ្នានោះ នគរបាលបានការចុះទៅដល់ទីតាំងកើតហេតុសារជាថ្មីម្តងទៀត ដើម្បីរុករកវត្ថុតាង ក៏ដូចជាតំរុយបទល្មើសបន្ថែម ដើម្បីឈានទៅដល់ការបំបែកសំណុំរឿងដ៏ក្តៅគគុកមួយករណីនេះ។
នគរបាលនៃការិយាល័យព្រហ្មទណ្ឌកំរិតធ្ងន់ខេត្តក្រចេះ បានឱ្យដឹងថា ក្រោយការស៊ើបអង្កេតពីកម្លាំងនគរបាលជំនាញ អស់រយៈពេលជាច្រើនថ្ងៃមកនេះ នគរបាលបានឃាត់ខ្លួន មនុស្សចំនួន៥នាក់ ដើម្បីសាកសួរ ហើយជនទាំង៥នាក់នោះ គឺសុទ្ឋសឹងតែរស់នៅ ក្បែរលំនៅដ្ឋានជនរងគ្រោះ ក្នុងភូមិប្អៀរ ឃុំថ្មី ស្រុកចិត្របុរី ខេត្តក្រចេះ។ ហើយការនាំខ្លួនមនុស្ស៥នាក់ជាបន្តបន្ទាប់មក ធ្វើការសាកសួរនេះ ក្រោយពីនគរបាលសង្ស័យថា ពួកគេទាំងនេះ អាចមានជាប់ពាក់ព័ន្ធនឹងករណីឃាតកម្ម សម្លាប់មនុស្ស យ៉ាងសាហាវនិងព្រៃផ្សៃបំផុត ។
សូមបញ្ជាក់ថា ករណីឃាតកម្ម ត្រូវបានគេចាត់ទុកថា ជាអំពើកាប់សម្លាប់មនុស្សយ៉ាងឃោរឃៅ និងព្រៃផ្សៃបំផុតមួយដែលពុំធ្លាប់មាន គឺបានកើតឡើងតាំងពីពាក់កណ្តាលយប់ថ្ងៃទី៩សីហា តែដោយសារគ្រួសាររបស់ជនរងគ្រោះ ស្នាក់នៅធ្វើចម្ការនៅឆ្ងាយពីភូមិ ទើបករណីនេះ បានបង្កឱ្យមានការភ្ញាក់ផ្អើល ដល់នគរបាលនៅយប់ថ្ងៃទី១១ សីហា ។
ជនរងគ្រោះទាំង៤នាក់ ៖ ១.ឈ្មោះ ឆុំ ឈន អាយុ៣០ឆ្នាំ ជាប្តី , ទី២.ឈ្មោះ ជួន សុខនាង អាយុ៣៣ឆ្នាំ ជាប្រពន្ធ ,ទី៣.ឈ្មោះ ឈាន គឹមឈី អាយុ១១ឆ្នាំ ជាកូនប្រុស និងទី៤.ឈ្មោះ ឈន វណ្ណី អាយុ៩ឆ្នាំ ជាកូនស្រី ។ ជនរងគ្រោះត្រូវបានជនដៃដល់វាយសម្លាប់ រួចដុតកម្ទេចសាកសព ជាមួយនឹងផ្ទះឈើចាំចម្ការមានទំហំ៤គុណ៦មែត្រ ដើម្បីបំភ័ន្តភ្នែកសមត្ថកិច្ចថា ជាករណីភ្លើងឆេះផ្ទះបណ្តាលឲ្យស្លាប់ មនុស្ស១គ្រួសារទៅវិញ ៕
Comments
Post a Comment